#ເຈົ້າແຂວງຈໍາປາສັກ ເຄື່ອນໄຫວຢ້ຽມຢາມໂຮງໝໍແຂວງ
---------==========-----------
#ວັນທີ 13 ສິງຫາ 2024, ທ່ານ ອາລຸນໄຊ ສູນນະລາດ ກຳມະການສູນກາງພັກ ເລຂາພັກແຂວງ ເຈົ້າແຂວງຈໍາປາສັກ ໄດ້ເຄື່ອນໄຫວຢ້ຽມຢາມໂຮງໝໍແຂວງ. ມີທ່ານ ດຣ.ວຽງສີ ສຸພັກດີ ກຳມະການພັກແຂວງ ຫົວໜ້າພະແນກສາທາລະນະສຸກແຂວງ, ທ່ານ ຄໍາສິງ ແກ້ວທອງກຸ ຜູ້ອໍານວຍການໂຮງໝໍແຂວງ ພ້ອມດ້ວຍການນໍາຫ້ອງວ່າການແຂວງ, ຄະນະພັກ - ຄະນະອໍານວຍການ, ສະມາຊິກພັກ - ພະນັກງານ ແພດ - ໝໍ ພາຍໃນໂຮງໝໍແຂວງ ເຂົ້າຮ່ວມ.
#ກ່ອນອື່ນ, ທ່ານ ດຣ.ຄໍາສິງ ແກ້ວທອງກຸ ຜູ້ອໍານວຍການໂຮງໝໍແຂວງ ໄດ້ລາຍງານສະພາບການເຄື່ອນໄຫວວຽກງານໂດຍຫຍໍ້, ໂຮງໝໍແຂວງຈຳປາສັກ ເປັນໂຮງໝໍປິ່ນປົວທົ່ວໄປຂອງລັດ, ເປັນໂຮງໝໍ 250 ຕຽງ, ມີພາລະບົດບາດ ໃຫ້ການບໍລິການກວດພະຍາດ - ປິ່ນປົວ - ຟື້ນຟູໜ້ທີ່ການ, ຄົ້ນຄ້ວາວິທະຍາສາດການແພດ, ກັນພະຍາດ ແລະ ສົ່ງເສີມສຸຂະພາບ, ຊີ້ນຳ - ຄຸ້ມຄອງ ໂຮງໝໍຂັ້ນລຸ່ມ ໃນດ້ານວຽກງານປິ່ນປົວ, ກໍ່ສ້າງ - ບໍາລຸງສ້າງພະນັກງານສາທາລະນະສຸກ ແລະ ເປັນໂຮງໝໍທີ່ສິດສອນ ນັກສຶກສາແພດ. ມາຮອດປະຈຸບັນ ໂຮງໝໍຈຳປາສັກ ໄດ້ຍົກລະດັບດ້ານການປິ່ນປົວພະຍາດສະເພາະວິຊາໄດ້ຕາມມາດຕະຖານ ແລະ ມີຄຸນນະພາບທີ່ໃກ້ຄຽງ ແລະ ເທົ່າທຽມກັບໂຮງໝໍສູນກາງ ແລະ ປະເທດໃກ້ຄຽງ ແລ້ວຈຳນວນໜຶ່ງ ເຊັ່ນ: ການປິ່ນປົວສະເພາະວິຊາເດັກ (ຫ້ອງເດັກແດງ), ຫົວໃຈເສັ້ນເລືອດ, ລະບົບຖ່າຍເທ, ລະບົບລະລາຍ, ຕ່ອມຂັບຍ່ອຍໃນ, ພະຍາດຊືມເຊື້ອ, ການຜ່າຕັດຜ່ານທໍ່ຜົ້ງທ້ອງ, ຜ່າຕັດສະໝອງ ແລະ ເປັນສູນປິ່ນປົວຜູ້ຕິດເຊື້ອເອດ, ຕິດເຊື້ອວັນນະໂລກທີ່ດື້ຢາ. ດ້ວຍຜົນສຳເລັດດັ່ງກ່າວ ໂຮງໝໍແຂວງຈຳປາສັກ ຈຶ່ງໄດ້ກາຍເປັນໂຮງໝໍສົ່ງຕໍ່ຂອງບັນດາໂຮງໝໍໃນ 4 ແຂວງພາກໃຕ້, ໃນ 6 ເດືອນຕົ້ນປີ 2024 ໄດ້ບໍລິການກວດພະຍາດເຂດນອກທັງໝົດ 23.297 ເທື່ອຄົນ, ຮັບເຂົ້ານອນ 16.768 ເທື່ອຄົນ, ຜ່າຕັດໃຫຍ່ 1.279 ກໍລະນີ, ຜ່າຕັດກາງ 245 ກໍລະນີ, ຜ່າຕັດນ້ອຍ 1,099 ກໍລະນີ, ຜ່າຕັດເອົາລູກອອກ 444 ຄົນ, ບໍລິການເກີດລູກ 1.335 ຄົນ , ອັດຕາການເສຍຊີວິດມີພຽງແຕ່ 0,52%.
#ທ່ານ ດຣ. ຄໍາສິງ ແກ້ວທອງກຸ ກ່າວຕື່ມວ່າ: ຄຽງຄູ່ກັບດ້ານດີທີາກ່າວຂ້າງເທິງ, ໂຮງໝໍແຂວງ ກໍຍັງມີຂໍ້ຫຍຸ້ງຍາກຫຼາຍດ້ານ ເຊິ່ງເປັນອຸປະສັກໃຫ້ແກ່ການຕອບສະໜອງການບໍລິການສຸຂະພາບໃຫ້ແກ່ປະຊາຊົນທີ່ເຂົ້າມາປິ່ນປົວ ເປັນຕົ້ນ ຈຳນວນບຸກຄາລາກອນບໍ່ພຽງພໍກັບຄວາມຕ້ອງການດ້ານວິຊາການ ໂດຍສະເພາະແພດ ແລະ ພະຍາຍານຊ່ຽວຊານປິ່ນປົວສະເພາະພະຍາດ, ອຸປະກອນການແພດທີ່ທັນສະໄໝ ຍັງມີຈຳນວນຈຳກັດ, ຈຳນວນໜຶ່ງກໍເກົ່າແກ່ - ຊຸດໂຊມ, ອາຄານສະຖານທີ່ຮອງຮັບຄົນເຈັບເມື່ອທຽບໃສ່ມາດຖານດ້ານວິຊາການ ແລະ ຄວາມຕ້ອງການຂອງປະຊາຊົນຜູ້ທີ່ເຈັບເປັນ ເຫັນວ່າຍັງບໍທັນພຽງພໍ. ຍ້ອນແນວນັ້ນ,ຈິ່ງສະເໜີຂໍກໍ່ສ້າງໂຮງໝໍໃໝ່ ທີ່ທັນສະໄໝ ເພື່ອຕອບສະໜອງໃຫ້ແກ່ການບໍລິການສຸຂະພາບ ແກ່ປະຊາຊົນໃນ 4 ແຂວງພາກໃຕ້, ຂໍໃຫ້ຂັ້ນເທິງພິຈາລະນະອະນຸມັດຄ່າຢາທີ່ນໍາໃຊ້ໃນການຄຸ້ມຄອງ ໂຄວິດ 19 ເຊິ່ງມີມູນຄ່າ 600 ກວ່າລ້ານ; ຂໍການສະໜັບສະໜູນໃນການສ້ອມແປງລະບົບນໍ້າ RO ແລະ ຂໍອຸປະກອນການແພດຈໍານວນໜຶ່ງເພີ່ມຕື່ມ
#ຈາກນັ້ນ, ທ່ານ ອາລຸນໄຊ ສູນນະລາດ ກຳມະການສູນກາງພັກ ເລຂາພັກແຂວງ ເຈົ້າແຂວງຈໍາປາສັກ ກໍມີຄໍາເຫັນໂອ້ລົມ ກ່ອນອື່ນທ່ານໄດ້ຕີລາຄາສູງຕໍ່ໝາກຜົນ, ຜົນງານໃນການນໍາພາ - ຊີ້ນຳຂອງຄະນະພັກ, ຄະນະນໍາທຸກຂັ້ນຂອງໂຮງໝໍ ທີ່ຍາດມາໄດ້ ແລະ ອັນພົ້ນເດັ່ນທີ່ສຸດ ເຫັນວ່າ ໂຮງໝໍໄດ້ເອົາໃຈໃສ່ສຸດຂີດໃນການຊຸກຍູ້ແຂ່ງຂັນ ການຈັດຕັ້ງປະຕິບັດມະຕິ ກໍຄື ແຜນພັດທະນາເສດຖະກິດ - ສັງຄົມ ຕາມທີ່ໄດ້ກຳນົດໄວ້. ເພື່ອສືບຕໍ່ໃນການຈັດຕັ້ງປະຕິບັດວຽກງານຈຸດສຸມຂອງໂຮງໝໍແຂວງ ໃຫ້ໄດ້ຮັບການພັດທະນາຍິ່ງຂຶ້ນກວ່າເກົ່າ ແລະ ການຈັດຕິປະບັດມະຕິກອງປະຊຸມຄົບຄະນະ ຄັ້ງທີ 13 ຂອງອົງຄະນະພັກແຂວງ ສະໄໝທີ VIII, ແຜນພັດທະນາເສດຖະກິດ - ສັງຄົມ 5 ປີ ຄັ້ງທີ IX ກໍຄືແຜນພັດທະນາເສດຖະກິດ - ສົງຄົມທີ່ແຂວງວາງອອກ ໃຫ້ໄດ້ຮັບຜົນສໍາເລັດຢ່າງຕໍ່ເນື່ອງ, ພ້ອມດຽວກັນນັ້ນ ກໍຢູ່ໃນໄລຍະສຸມໃສ່ກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ ຕິດພັນກັບການຍູ້ແຮງການຜັນຂະຫຍາຍມະຕິກອງກົມການເມືອງສູນກາງພັກ, ຂອງລັດຖະບານ ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົ້ນເອງ (ສອຈ) ເພື່ອນໍາພາ - ຊີ້ນໍາ ແລະ ຜັນຂະຫຍາຍໃຫ້ລົງເລິກເຖິງທ້ອງຖິ່ນຮາກຖານ, ຂໍໃຫ້ສືບຍົກສູງທາງດ້ານການເມືອງ ແລະ ນໍາພາແນວຄິດ 3 ຢ່າງ ຄື: ໃຫ້ມີຈິດໃຈສະຕິຊາດສູງຂຶ້ນ ຕ້ອງປະກອບສ່ວນພັນທະຕໍ່ຊາດ ນໍາໃຊ້ຜະລິດຕະພັນລາວ ເພື່ອສົ່ງເສີມຜະລິດຕະພັນພາຍໃນ; ສ້າງຄວາມເປັນແບບຢ່າງ, ລົງພື້ນທີ່ ນໍາພາພາກສະໜາມ ຕິດພັນກັນການແກ້ໄຂບັນຫາຕົວຈິງ.ສືບຕໍ່ເພີ່ມທະວີຄວາມສາມັກຕີ ພາຍໃນຄະນະ ຕ້ອງມີຄວາມເປັນເອກະພາບ ລວມສູນປະຊາທິປະໄຕ 3 ຢ່າງຄື: ເອກະພາບທາງດ້ານແຜນການ, ເອກະພາບ ໃນການຈັດວາງບຸກຄະລາກອນ ແລະ ເອກະພາບທາງດ້ານເສດຖະກິດ. ຂໍໃຫ້ສຸມໃສ່ໃນການປັບປຸງລະບົບການຈັດຕັ້ງ ໂດຍສະເພາະແມ່ນສຸ່ມໃສ່ 3 ວຽກ ຄື: ວຽກຂະບວນການ, ວຽກກະກຽມດ້ານເນື້ອໃນ, ກະກຽມວຽກງານບຸກຄະລາກອນ. ຂໍໃຫ້ຄະນະພັກແຕ່ລະຂັ້ນ ທີ່ຈະກະກຽມໃຫ້ກ້ອງປະຊຸມໃຫຍ່ ຈົ່ງໄດ້ກະກຽມແບບແຜນ 3 ຢ່າງ ຄື: ແຜນແຜນດໍາລົງຊີວິດ, ແບບແຜນວິທີເຮັດວຽກ, ແບບແຜນການນໍາພາ. ຂໍໃຫ້ສືບຕໍ່ນໍາພາ - ຊີ້ນໍາ ໃນການປະຕິບັດຫຼັກການ, ລະບຽບການ ແລະ ມາດຕະການກ່ຽວກັບການເຜີຍແຜ່ວຽກງານອະນາໄມ ແລະ ສົ່ງເສີມສຸຂະພາບ ເພື່ອເຮັດໃຫ້ວຽກງານດັ່ງກ່າວ ໄດ້ຮັບການຈັດຕັ້ງປະຕິບັດຢ່າງມີປະສິດທິພາບ, ປະສິດທິຜົນ, ຕໍ່ເນື່ອງ ແລະ ຍືນຍົງ ແນໃສ່ຮັບປະກັນໃຫ້ພົນລະເມືອງມີສຸຂະພາບດີ, ມີອາຍຸຍືນ, ຫຼຸດຜ່ອນການຕິດເຊື້ອພະຍາດ, ການເຈັບປ່ວຍ ແລະ ການເສຍຊີວິດ, ສາມາດເຊື່ອມໂຍງກັບພາກພື້ນ ແລະ ສາກົນ,
#ພ້ອມນີ້, ທ່ານເຈົ້າແຂວງ ຍັງເນັ້ນໃຫ້ສືບຕໍ່ ເອົາໃຈໃສ່ປັບປຸງວຽກງານປິ່ນປົວໃຫ້ມີຄຸນນະພາບ ແລະ ສະໜອງການບໍລິການດ້ານສາທາລະນະສຸກຢ່າງທົ່ວເຖິງ ຕາມແຜນປະຕິຮູບລະບົບສາທາລະນະສຸກ ແລະ ແຜນຍຸດທະສາດກ່ຽວກັບການປິ່ນປົວໃນແຕ່ລະໄລຍະ, ສົ່ງເສີມການບໍລິການປິ່ນປົວ ໂດຍສົມທົບ ລະຫວ່າງ ການແພດສະໄໝໃໝ່ ແລະ ການແພດພື້ນເມືອງ ແນໃສ່ເຮັດໃຫ້ພົນລະເມືອງທຸກຄົນ ມີສຸຂະພາບດີ, ແຂງແຮງ ໂດຍສະເພາະແມ່ ແລະ ເດັກ, ປະຊາຊົນຜູ້ທຸກຍາກ, ຜູ້ຢູ່ຫ່າງໄກສອກຫຼີກ, ຜູ້ພິການ, ຜູ້ເສຍອົງຄະ ແລະ ຜູ້ອາຍຸສູງ. ຂໍໃຫ້ສົ່ງເສີມວຽກງານປິ່ນປົວດ້ວຍການສະໜອງງົບປະມານ, ພາຫະນະ, ອຸປະກອນ, ປະກອບບຸກຄະລາກອນ ເຂົ້າໃນວຽກງານປິ່ນປົວຢ່າງເໝາະສົມ ແລະ ປະຕິບັດນະໂຍບາຍປິ່ນປົວເສຍຄ່າ ຫຼື ບໍ່ເສຍຄ່າ ຕາມລະບຽບການ. ຂໍໃຫ້ສືບຕໍ່ສົ່ງເສີມການພົວພັນ ການຮ່ວມມືກັບຕ່າງປະເທດ, ພາກພື້ນ ແລະ ສາກົນ ກ່ຽວກັບວຽກງານການປິ່ນປົວ ດ້ວຍການຄົ້ນຄວ້າ, ແລກປ່ຽນຂໍ້ມູນຂ່າວສານ, ຄວາມຮູ້, ຄວາມກ້າວໜ້າທາງດ້ານວິທະຍາສາດ, ເຕັກໂນໂລຊີການແພດ, ການສ້າງບຳລຸງພະນັກງານ, ຍາດແຍ່ງການຊ່ວຍເຫຼືອ ທຸກໂອກາດ.
#ສໍາລັບຄໍາສະເໜີຂອງຄະນະພັກ - ຄະນະນໍາໂຮງໝໍແຂວງ ກ່ຽວກັບການກໍ່ສ້າງໂຮງໝໍໃໝ່ ທີທັນສະໄໝ ເພື່ອຕອບສະໜອງໃຫ້ແກ່ການບໍລິການສຸຂະພາບ ແກ່ປະຊາຊົນໃນ 4 ແຂວງພາກໃຕ້ ທ່ານເຈົ້າແຂວງເຫັນດີ, ສ່ວນບັນຫາຈຳນວນບຸກຄະລາກອນບໍ່ພຽງພໍກັບຄວາມຕ້ອງການດ້ານວິຊາການການຂໍໃຫ້ຄະນະພັກ - ຄະນະນໍາໂຮງໝໍແຂວງ ກວດກາ - ຈັດສັນພະນັກງານແພດໝໍ ທີ່ຢູ່ຝ່າຍບໍລິຫານ ໄປຊ່ວຍວຽກວິຊາການ ເພື່ອແກ້ໄຂບຫນຫາສະເພາະໜ້າ; ສໍາລັບຄ່າຢາທີ່ນໍາໃຊ້ໃນການຄຸ້ມຄອງ ໂຄວິດ 19 ເຊິ່ງມີມູນຄ່າ 600 ກວ່າລ້ານກີບນັ້ນ, ທ່ານເຈົ້າແຂວງ ໄດ້ຮັບປາກ ແລະ ມອບໃຫ້ຫ້ອງວ່າການແຂວງ ນໍາເອົາໄປປຶກສາຫາລືກັບພະແນກການເງິນແຂວງ ເພື່ອຈັດສັນງົບປະມານມາຊ່ວຍເຫຼືອ ແລະ ຂໍການສະໜັບສະໜູນໃນການສ້ອມແປງລະບົບນໍ້າ RO ແລະ ຂໍອຸປະກອນການແພດຈໍານວນໜຶ່ງເພີ້ມຕື່ມ ເຊິ່ງ ການມາຢ້ຽມຢາມໂຮງໝໍແຂວງຄັ້ງນີ້ ທ່ານ ເຈົ້າແຂວງ ກໍໄດ້ມອບເງິນ 330 ລ້ານກວ່າກີບ ເພື່ອສະໜັບສະໜູນໃນການສ້ອມແປງດັ່ງກ່າວ.
*** ຂ່າວ-ພາບ: ທູນທອງໃຈ + ໄກ່ ໂຮງໝໍແຂວງ + ພູທິບສະຫວັນ ຫ້ອງວ່າການແຂວງ ***
ອ່ານເພີ່ມ
