ກຳມະບານໂຮງງານຜະລິດຢາ ຊີບີເອຟ ປະຕິບັດຂໍ້ແຂ່ງຂັນ 5 ເປັນເຈົ້າ ຕິດພັນກັບການຜະລິດຢາເປັນສິນຄ້າ
#ກຳມະບານໂຮງງານຜະລິດຢາ ຊີບີເອຟ ປະຕິບັດຂໍ້ແຂ່ງຂັນ 5 ເປັນເຈົ້າ ຕິດພັນກັບການຜະລິດຢາເປັນສິນຄ້າ
-----========-----
#ສະຫາຍ ສົມໄຊ ຫົງສະຫວາດ ປະທານສະຫະພັນກໍາມະບານຮາກຖານໂຮງງານຜະລິດຢາ ຊີບີເອຟ ລາຍງານຕໍ່ກອງປະຊຸມໃຫຍ່ ຜູ້ແທນສະຫະພັນກໍາມະບານທົ່ວແຂວງຈໍາປາສັກ ຄັ້ງທີ IX ທີ່ຈັດຂຶ້ນໃນທ້າຍເດືອນມີນາ 2025 ທີ່ຜ່ານມາ ກ່ຽວກັບການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ຕິດພັນກັບການຜະລິດຢາເປັນສິນຄ້າ ວ່າ: ພາຍໃຕ້ການນໍາພາ - ຊີ້ນຳ ອັນສະຫຼາດສ່ອງໃສຂອງຄະນະໜ່ວຍພັກໂຮງງານຜະລິດຢາ ຊີບີເອຟ ແລະ ຄະນະສະຫະພັນກຳມະບານແຂວງ, ກໍາມະບານໂຮງງານຜະລິດຢາ ຊີບີເອຟ ໄດ້ປະສານສົມທົບຢ່າງກົມກຽວກັບອົງການຈັດຕັ້ງຊາວໜຸ່ມ, ແມ່ຍິງ, ການຈັດຕັ້ງພາກ - ລັດ ກໍຄືພະນັກງານ - ກຳມະກອນທົ່ວໂຮງງານ, ສ້າງຄວາມສາມັກຄີ ເປັນປຶກແຜ່ນໃນການນຳພາ - ຊີ້ນຳ ເຮັດໃຫ້ອົງການຈັດຕັ້ງກຳມະບານ ພາຍໃນໂຮງງານມີຄວາມໜັກແໜ້ນ, ເຂັ້ມແຂງທາງດ້ານການເມືອງ - ແນວຄິດ ແລະ ການຈັດຕັ້ງ, ສ້າງໃຫ້ສະມາຊິກກຳມະບານ, ກຳມະກອນຊາວຜູ້ອອກແຮງງານ ຮັກສາໄດ້ຄຸນທາດການເມືອງ, ຄຸນສົມບັດສິນທຳປະຕິວັດ ຕິດພັນກັບຂໍ້ແຂ່ງຂັນ ຮັກຊາດ ແລະ ພັດທະນາ, 2 ວາລະແຫ່ງຊາດ ແລະ ເນື້ອໃນຂໍ້ແຂ່ງຂັນ 5 ເປັນເຈົ້າ. ໃນນັ້ນ, ເປັນເຈົ້າການຝຶກຝົນຫຼ່ໍຫຼອມ ທາງດ້ານການເມືອງ - ແນວຄິດ, ສະຫະພັນກຳມະບານໂຮງງານຜະລິດຢາ ຊີບີເອຟ ໄດ້ຢຶດໝັ້ນທິດຊີ້ນຳຂອງພັກ ໃນການຍົກສູງການຝຶກຝົນຫຼ່ໍຫຼອມຕົນເອງ ໃຫ້ມີທັດສະນະການເມືອງທີ່ໜັກແໜ້ນ, ມີຫຼັກໝັ້ນຊົນຊັ້ນກໍາມະກອນ, ມີຄວາມຈົ່ງຮັກພັກດີຕໍ່ພັກ - ລັດ, ມີຄຸນສົມບັດສິນທໍາປິຕິວັດ, ເຄົາລົບກົດໝາຍ, ລະບຽບວິໄນ ແລະ ລະບຽບການອອກແຮງງານ, ຄົ້ນຄວ້າຮ່ຳຮຽນ, ເຊື່ອມຊຶມແນວທາງນະໂຍບາຍຂອງພັກ, ເປັນເຈົ້າການນໍາພາດໍາເດີນຊີວິດການເມືອງ - ສໍາຫຼວດກວດກາປະຈໍາເດືອນ ເພື່ອຕໍານິຕິຊົມຕົນເອງ, ຕິຊົມໝູ່ເພື່ອນ. ຈາກນັ້ນ, ກໍນໍາພາດ້ານການເມືອງ, ເຊື່ອມຊຶມເອກະສານທີ່ສໍາຄັນຂອງພັກ, ຂອງຊາດ, ບັນດາລະບຽບການຂອງໂຮງງານວາງອອກ ເຮັດໃຫ້ສະມາຊິກກໍາມະບານພາຍໃນໂຮງງານ ມີທັດສະນະມະຫາຊົນກ້ວາງຂວາງ, ມີແນວຄິດອຸ່ນອ່ຽງທຸ່ນທ່ຽງ - ເຊື່ອໝັ້ນຕໍ່ການນຳພາຂອງພັກ - ລັດ, ມີຄວາມສາມັກຄີໃກ້ຊິດຕິດແທດກັບໝູ່ເພື່ອນສະມາຊິກກໍາມະບານ, ກໍາມະກອນ - ຊາວຜູ້ອອກແຮງງານ, ມີສະຕໍ່ການຈັດຕັ້ງ , ມີແນວຄິດບໍລິສຸດສັດຊື່, ປະຍັດມັດທະຍັດ, ບໍ່ຫຼີ້ນກິນຟູມເຟືອຍ ແລະ ແຕ່ລະຄອບຄົວມີຄວາມສະຫງົບ; ເປັນເຈົ້າການປະຕິບັດກົດໝາຍ ແລະ ລະບຽບການຂອງລັດ. ໂຮງງານຜະລິດຢາ ຊີບີເອຟ ແມ່ນລັດວິສະຫາກິດປະສົມ ເຊິ່ງແມ່ນໝາກຜົນຂອງການຮ່ວມມືຂອງ ສອງແຂວງແຮກສ່ຽວ ລະຫວ່າງ ແຂວງຈໍາປາສັກ ສປປ ລາວ ແລະ ແຂວງບິນດິ້ງ ສສ ຫວຽດນາມ, ປະຕິບັດໜ້າທີ່ຍຸດທະສາດ ຜະລິິດ ແລະ ຈໍາໜ່າຍຢາປົວພະຍາດອອກຮັບໃຊ້ສັງຄົມເພື່ອທົດແທນການນຳເຂົ້າ ເຊິ່ງໂຮງງານໄດ້ນຳໃຊ້ລະບຽບການ, ຂໍ້ກຳນົດຂອງຊາດ ແລະ ສາກົນ ເຂົ້າໃນດຳເນີນການຜະລິດ - ທຸລະກິດ ເຊັ່ນ: ໄດ້ດຳເນີນການຜະລິດຢາຕາມມາດຕະຖານຫຼັກການຜະລິດທີ່ດີ GMP, ໃຊ້ຫຼັກການບໍລິຫານຄຸນນະພາບຕາມມາດຕະຖານສາກົນ ISO9001: 2025, ການກວດກາວິໄຈຄຸນນະພາບ ນັບແຕ່ຂອດວັດຖຸດິບນຳເຂົ້າ ຈົນຮອດຜະລິດຕະພັນສຳເລັດຮູບ ແມ່ນໄດ້ປະຕິບັດຕາມຫຼັກການຫ້ອງທົດລອງທີ່ດີ ແລະ ຂໍ້ກຳນົດດ້ານຄວາມສາມາດຂອງຫ້ອງທົດລອງ ຕາມມາດຕະຖານສາກົນ ISO/ICE 17025:2017.
#ສໍາລັບເປັນເຈົ້າການ ພັດທະນາຕົນເອງ ແລະ ການຈັດຕັ້ງ, ສະຫະພັນກຳມະບານໂຮງງານຜະລິດຢາ ຊີບີເອຟ ປະກອບມີ 3 ຮາກຖານ, ແບ່ງເປັນ 9 ໜ່ວຍ, ມີສະມາຊິກທັງໝົດ 226 ສະຫາຍ, ຍິງ 105 ສະຫາຍ, ທຽບໃສ່ປີ 2021 ເພີ່ມຂຶ້ນ 16,49%, ກວມເອົາ 97,83% ຂອງພະນັກງານ - ກຳມະກອນທັງໝົດ, ໃນນີ້ ສະມາຊິກກຳມະບານເປັນສະມາຊິກພັກ 22 ສະຫາຍ, ຍິງ 10 ສະຫາຍ; ໄດ້ນຳພາເປິດກອງປະຊຸມປະເມີນສະຫະພັນ, 3 ຮາກຖານທີ່ຂຶ້ນກັບ ຕາມເນື້ອໃນຂໍ້ແຂ່ງຂັນ 5 ເປັນເຈົ້າ ໃນແຕ່ລະປີ; ຮັບມະຫາຊົນກ້າວໜ້າດີເດັ່ນເຂົ້າເປັນສະມາຊິກກໍາມະບານລາວ ຈໍານວນ 33 ສະຫາຍ, ຍິງ 8 ສະຫາຍ ແລະ ໃນໂອກາດງານສະເຫຼີມສະຫຼອງການສ້າງຕັ້ງ ບໍລິສັດ ຊີບີເອຟ ຄົບຮອບ 30 ປີ, ສະມາຊິກກໍາມະບານ ກໍໄດ້ຮັບການຍ້ອງຍໍສັນລະເສີນ, ປະດັບຫຽນໄຊອິດສະຫຼະຊັ້ນ II, ມີ 1 ສະຫາຍ, ຫຼຽນໄຊອິດສະຫຼະຊັ້ນ III ມີ 5 ສະຫາຍ ຍິງ 1 ສະຫາຍ, ຫຼຽນໄຊແຮງງານຊັ້ນ I ມີ 2 ສະຫາຍ, ຫຼຽນໄຊແຮງງານຊັ້ນ II ມີ 2 ສະຫາຍ, ຍິງ 1 ສະຫາຍ, ຫຼຽນໄຊແຮງງານຊັ້ນ III ມີ 10 ສະຫາຍ, ຍິງ 4 ສະຫາຍ, ຫຼຽນກາແຮງງານ ມີ 19 ສະຫາຍ, ຍິງ 14 ສະຫາຍ, ໄດ້ຮັບໃບຍ້ອງຍໍລັດຖະບານ 20 ສະຫາຍ, ຍິງ 11ສະຫາຍ, ໃບຍ້ອງຍໍເຈົ້າແຂວງ 67 ສະຫາຍ, ຍິງ 33 ສະຫາຍ, ໃບຍ້ອງຍໍພະແນກສາທາລະນະສຸກແຂວງ 87 ສະຫາຍ, ຍິງ 41 ສະຫາຍ, ໃບຍ້ອງຍໍຂັ້ນໂຮງງານ 11 ສະຫາຍ, ຍິງ 2 ສະຫາຍ.
#ເປັນເຈົ້າການປົກປ້ອງສິດ ແລະ ຜົນປະໂຫຍດອັນຊອບທໍາ,ໄດ້ເອົາໃຈໃສ່ດູແລຄວາມປອດໄພແຮງງານດ້ານສະພາບແວດລ້ອມ, ການເຮັດວຽກ, ການປະກອບເຄື່ອງນຸ່ງ, ອຸປະກອນປ້ອງກັນອຸບັດເຫດແຮງງານ, ຮັບການກວດກາສຸຂະພາບທົ່ວໄປ, ກວດສຸຂະພາບສະເພາະ, ການວັດແທກສາຍຕາປະຈໍາປີ 1ຄັ້ງ/ປີ, ກໍາມະບານ - ກໍາມພກອນ ຢູ່ຫ້ອງຜະລິດ 2 ຄັ້ງ/ປີ; ຈັດຕັ້ງຕໍ່ສັນຢາແຮງງານລວມໝູ່ ສະບັບປັບປຸງໃໝ່ ເພື່ອໃຫ້ສອດຄ່ອງຕາມກົດໝາຍແຮງງານ, ກົດໝາຍປະກັນສັງຄົມ, ເບິກຈ່າຍເງິນເດືອນ ບໍ່ໃຫ້ກາຍວັນທີ 10 ຂອງເດືອນຖັດໄປ, ໃຫ້ການອຸດໜູນຕໍ່ຜູ້ທີ່ເຮັດວຽກຢູ່ເຂດຄວບຄຸມພິເສດ. ພ້ອມນີ້ ກໍມີກອງທຶນພັດທະນາ ຊີບີເອຟ ໃນການໃຫ້ສະມາຊິກກູ້ຢືມໃນອັດດອກເບ້ຍ 8%/ປີ ເພື່ອໃຊ້ຈ່າຍໃນການສ້າງເສດຖະກິດຄອບຄົວ ປູກຝັງ - ລ້ຽງສັດ, ປູກສ້າງທີ່ຢູ່ອາໄສ, ປະຕິບັດນະໂຍບາຍຕໍ່ສະມາຊິກທີ່ ພໍ່ແມ່ຄີງເສຍຊີວິດ, ສະມາຊິກແຕ່ງງານ, ເກີດລູກໃໝ່, ເຈັບໄຂ້ນອນໂຮງໝໍ, ຜ່າຕັດໃຫຍ່ ລວມ ມີ 26 ກໍລະນີ, ມູນຄ່າ 26 ລ້ານກີບ.
#ເປັນເຈົ້າການປະຕິບັດໜ້າທີ່ວິຊາສະເພາະຢ່າງປະດິດສ້າງ, ໄດ້ສົມທົບກັບຝ່າຍຜະລິດ ສ້າງ ແລະ ປະກາດໃຊ້ກໍານົດໝາຍແຮງງານການຜະລິດຢາ ໄດ້ທັງໝົດ 157 ລາຍການ; ປະກອບສ່ວນໃນການປະຕິບັດຕົວເລກການຜະລິດຢາປົວພະຍາດສາມາດເຕີບໂຕສະເລ່ຍ 29%/ປີ; ປະກອບສ່ວນໃນການປະຕິບັດແຜນຕົວເລກການຂາຍສາມາດເຕີບໂຕສະເລ່ຍ 19%/ປີ; ການຕິດຕາມຄວບຄຸມຂັ້ນຕອນການຜະລິດ, ການສະໜອງປັດໄຈການຜະລິດຕ່າງໆ ແມ່ນດຳເນີນໄປຢ່າງມີປະສິດທິຜົນ. ວຽກງານຂະບວນການຕ່າງໆ ໂດຍສະເພາະແມ່ນວຽກງານສົ່ງເສີມ - ພັດທະນາກິລາຂອງໂຮງງານ, ໄດ້ນຳພາສະມາຊິກຈັດກິດຈະກຳແຂ່ງຂັນບານສົ່ງ, ບານເຕະ, ເປຕັງ ຢູ່ພາຍໃນ ແລະ ແຂ່ງຂັນກັບພາຍນອກ ເນື່ອງໃນໂອກາດຕ້ອນຮັບ - ສະເຫຼີມສະຫຼອງວັນສຳຄັນຂອງພັກຂອງຊາດ. ວຽກການສ້າງສະພາບແວດລ້ອມທີ່ດີໃນການເຮັດວຽກ, ໄດ້ນຳເອົາຫຼັກການ 5 ສ ຄື: ສະສາງ, ສະດວກ, ສະອາດ, ສ້າງມາດຕະຖານ ແລະ ສ້າງນິໄສ ຂຽນເປັນແຜນງານ, ແຜນກິດຈະກຳ ແລະ ຈັດຕັ້ງຊິກເຄື່ອນໄຫວອອກແຮງງານອະນາໄມບໍລິເວນດ້ານໜ້າ ແລະ ພາຍໃນເດີ່ນໂຮງງານໃນທຸກໆວັນເສົາ.ພ້ອມນີ້ກໍໄດ້ນຳພາໄປທັດສະນະສືກສາຢູ່ຂ້າງນອກເນື່ອງໃນວັນກຳມະກອນສະກົນ 1 ພຶດສະພາ ເພື່ອໃຫ້ພະນັກງານກຳມະກອນໄດ້ຜ່ອນຄອຍແລະສະມັກຄີຫລີ້ນກິດຈະກຳຕ່າງໆຮ່ວມກັນຢ່າງເປັນຂະບວນຟົດຟື້ນ.
#ສະຫາຍ ສົມໄຊ ຫົງສະຫວາດ ກ່າວຕອນທ້າຍອີກວ່າ: ເພື່ອສຶບຕໍ່ຈັດຕັ້ງປະຕິບັດພາລະບົດບາດ ສິດ - ໜ້າທີ່ ຂອງຄະນະປະທານສະຫະພັນ ແລະ ຄະນະຮາກຖານໃນການນຳພາສະມາຊິກກຳມະບານ - ກຳມະກອນ ໃນການຈັດຕັ້ງຜັນຂະຫຍາຍວຽກງານນະໂຍບາຍ ກໍຄື ການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ຕິດພັນກັບການຜະລິດຢາເປັນສິນຄ້າ, ສະຫະພັນກຳມະບານໂຮງງານຜະລິດຢາ ຊີບີເອຟ ຈະໄດ້ສຸມໃສ່ປະຕິບັດວຽກທີ່ເປັນຍຸດທະສາດ ຄື: ສຶກສາອົບຮົບການເມືອງ - ແນວຄິດໃຫ້ຖັນແຖວສະມາຊິກກຳມະບານ ໃຫ້ມີຄວາມເຊື່ອໝັ້ນ ຕໍ່ການນຳພາຂອງຄະນະພັກ - ຄະນະອຳນວຍການ, ມີຄຸນທາດການເມືອງໜັກແໜ້ນ; ເອົາໃຈໃສ່ຕິດຕາມ, ຊຸກຍູ້ ຢ່າງໃກ້ຊິດຕໍ່ການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ຢ່າງຕໍ່ເນື່ອງ; ຄະນະສະຫະພັນ ຕ້ອງສົມທົບກັບ ຄະນະຮາກຖານຢ່າງສະນິດແໜ້ນເພື່ອພ້ອມກັນຂຽນແຜນຍຸດທະສາດ ການນຳພາສະມາຊິກຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ໃຫ້ຕິດພັນທັງທາງກົງ ແລະ ທາງອ້ອມກັບວຽກງານການຜະລິດຢາເປັນສິນຄ້າຂອງໂຮງງານຢ່າງມີປະສິດທິພາບ ແລະ ປະສິດທິຜົນ; ສືບຕໍ່ເອົາໃຈໃສ່ຕິດຕາມການປະຕິບັດ, ການຕໍ່ສັນຍາແຮງງານລວມໝູ່ ເພື່ອປົກປ້ອງສິດ ແລະ ຜົນປະໂຫຍດອັນຊອບທໍາຂອງສະມາຊິກກໍາມະບານ - ພະນັກງານ - ກຳມະກອນ; ຕິດຕາມກວດກາການປະຕິບັດນະໂຍບາຍ, ສະຫວັດດີການຕ່າງໆໃຫ້ມີຄວາມເປັນທໍາ, ສອດຄ່ອງຕາມລະບຽບກົດໝາຍທີ່ກຳນົດໄວ້, ພ້ອມນັ້ນ ກໍນຳພາປະຕິບັດວິໄນຢ່າງເຄັ່ງຄັດຕໍ່ຜູ້ທີ່ລະເມີດລະບຽບວິໄນ; ສະຫະພັນຕ້ອງເປັນໃຈກາງໃນການສົມທົບກັບອົງການຈັດຕັ້ງແມ່ຍິງ, ຊາວໜຸ່ມ ນໍາພາສ້າງຂະບວນການອອກແຮງງານອະນາໄມ, ແຂ່ງຂັນກິລາ, ສິລະປະ ສະເຫຼີມສະຫຼອງ ແລະ ຕ້ອນຮັບວັນສຳຄັນຕ່າງໆຂອງພັກ, ຂອງຊາດ,ອົງການຈັດຕັ້ງມະຫາຊົນ ແລະ ໂຮງງານຢ່າງເປັນຂະບວນຟົດຟື້ນ.
* ຂ່າວ-ພາບ: ທູນທອງໃຈ *0
